Kua riro mai i a He Tohu ngā tohu hoahoa ā-motu

9 Whiringa-ā-nuku 2017

E whitu ngā tohu i riro mai i a, He Tohu, i Te Puna Mātauranga o Aotearoa i Ngā Tohu Hoahoa Hira Rawa (Best Design Awards) a te Designers Institute of New Zealand i te Paraire te 6 o Whiringa-ā-nuku.

Ko ngā tohu Hira Rawa ngā tohu hoahoa nui awa i Aotearoa me Ahitereiria, he whakaaturanga ā-tau i ngā mahi tiketike o te hoahoa ā-whakairoiro, ā-wāhi, ā-hua, pāhekoheko, nekehanga hoki.

I whiwhi i a He Tohu te Tohu Pine Poroporo 'Toa o Ngā Toa' mō ngā hoahoanga, tae atu ki ngā kōura e rua, kotahi te hiriwa, ā, e toru ngā parāhi i ētahi atu wāhanga hoahoa tiketike mō ngā mahi hoahoa, waitohu, mahi pāhekoheko me ngā ahurea-tauwhiti.

Ko te kī a ngā kaiwhakawā mō te wāhi whakaaturanga: "He tino mahi tēnei! ...ka oho katoa te mauri i te rerehua o ngā riporipo o ngā papa. Koea ana ngā iroirotanga me te atamai o ngā pānga tūrama kia noho mai ai he āhuatanga ā-toi rawe."

E whakaatu ana a He Tohu i ngā tuhinga tūāpapa hira rawa e toru ki tētahi wāhi whakaaturanga tino hou rawa: 1835 He Whakaputanga o te Rangatiratanga o Nu Tireni; 1840 Te Tiriti o Waitangi; Te Petihana Whakamana Pōti Wahine.

"E whakaatu ana tēnei tohu i ngā pūkenga, tohungatanga me ngā whakaaro nui i oti kia puta ai tēnei whakaaturanga hou tino auaha rawa," te kī a Peter Murray, te Pouārahi Tuarua o Te Tari Taiwhenua. "He kaupapa ahurea whakahirahira a He Tohu ki te motu whānui, he pātuitanga Karauna-Iwi e whakanui ana me te tiaki i ēnei tuhinga tūāpapa puiaki mō ngā whakatipuranga o muri. Kua tino eke tēnei whakaaturanga, kua eke ā-tūmatanui hoki, ā, nā ngā mahi tino hoahoa tētahi take nui i pērā ai."

Ka nui ake te wātea mai i a He Tohu me te pāhekoheko o te iwi whānui ki ēnei tuhinga ā-ture me te whakarite ka whai hua rātau mai i ngā hangarau rokiroki hou rawa, whakaatu hoki kia tiakina mā ngā whakatipuranga o muri.

Kei te wātea ētahi atu taipitopito mō Ngā Tohu Hoahoa Hira Rawa i konei.

Mō ētahi atu kōrero mō He Tohu haere ki tā mātau paetukutuku, ki tā mātau whārangi Pukamata rānei #hetohu

He whakamārama:

I tuwhera mai He Tohu ki te iwi whānui i te 20 o Haratua 2017 i Te Puna Mātauranga o Aotearoa. He whakaaturanga tūmau, koreutu hoki e aratakina ana e Te Tari Taiwhenua i te taha o te Māori. Ka noho ngā tuhinga e toru ki raro i te mana tiaki ā-ture o te Kaipūranga Matua me Te Rua Mahara o Te Kāwanatanga.

Ko te matakitenga o te whakaaturanga: He whakapapa kōrero, he whenua kura. Ko te whāinga o He Tohu he tuku kōrero anō, whai wāhitanga hoki hei tūhonohono ki ngā tuhinga e toru, e whakawhānui ana i ngā māramatanga me ngā matapakinga.

He mea hoahoa te whakaaturanga e Story Inc, i te taha o Studio Pacific Architecture me ngā kaihoahoa pāhekoheko a Click Suite. He mea waihanga e Fletcher Construction.

I mahi tahi a Story Inc me ngā kete kōrero a Te Rua Mahara o Te Kāwanatanga me Te Puna Mātauranga o Aotearoa me ngā poari tohutohu e rua. I tuku tohutohu pūkenga tētahi Rōpū Pūkenga Māori ki te kaupapa, ā, he wāhanga nui tō tēnei rōpū i roto i ngā mahi whakawhanake ariā me te whakatakoto me te raupapa haere i ngā kōrero. Nā tētahi Rōpū Tohutohu Petihana Pōti a te Wahine, he tautōhito ki te kaupapa, i tuku tohutohu anō mō te whakaaturanga.

Kei Te Puna Mātauranga o Aotearoa i Te Whanganui-a-Tara a He Tohu. E whakaaturia ana te whakaaturanga e Te Rua Mahara o te Kāwanatanga me Te Puna Mātauranga o Aotearoa, kei raro ēnei whakahaere e rua i Te Tari Taiwhenua. Ka noho ēnei tuhinga i raro i te mana tiaki o te Kaipūranga Matua me Te Rua Mahara o Te Kāwanatanga. Ka tuwhera a He Tohu mō ngā rā e ono i te wiki, ā, kāore he utu. Mō ētahi atu kōrero haere ki tā mātau paetukutuku, ki tā mātau whārangi Pukamata rānei #hetohu

Atahanga: I roto i te rūma tuhinga o He Tohu. Pikitia nā: Jeff McEwan

Mō ētahi atu kōrero, whakapā atu ki media@dia.govt.nz waea rānei ki +64 27 535 8639